ឯកឧត្តម ហ៊ែល តូនី អនុប្រធានទទួលបន្ទុកក្តាប់រួម អាជ្ញាធរទន្លេសាប ដឹកនាំប្រជុំពិនិត្យតាមដានការអនុវត្តការងារប្រចាំត្រីមាសទី ១ ឆ្នាំ ២០២៤ របស់អគ្គលេខាធិការដ្ឋាន អាជ្ញាធរទន្លេសាប
នាព្រឹកថ្ងៃអង្គារ ១៥ កើត ខែចេត្រ ឆ្នាំរោង ព.ស ២៥៦៧ ត្រូវនឹងថ្ងៃទី ២៣ ខែមេសា ឆ្នាំ ២០២៤ ឯកឧត្តម ហ៊ែល តូនី អនុប្រធានទទួលបន្ទុកក្តាប់រួម អាជ្ញាធរទន្លេសាប តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ថោ ជេដ្ឋា ប្រធានអាជ្ញាធរទន្លេសាប បានដឹកនាំកិច្ចប្រជុំពិនិត្យ តាមដានលើលទ្ធផលនៃការអនុវត្តការងារប្រចាំត្រីមាសទី ១ ឆ្នាំ២០២៤ របស់អគ្គលេខាធិការដ្ឋាន អាជ្ញាធរទន្លេសាប ដែលមានការចូលរួមពី ឯកឧត្តមអនុប្រធាន អគ្គលេខាធិការ អគ្គលេខាធិការរង លោកទីប្រឹក្សា ប្រធាននាយកដ្ឋាន អនុប្រធាននាយកដ្ឋាន និងមន្ត្រីបច្ចេកទេសក្រោមឱវាទអគ្គលេខាធិការដ្ឋាន នៃអាជ្ញាធរទន្លេសាប ។
សូមជម្រាបជូនថា កិច្ចប្រជុំនេះ គឺដើម្បី (១). ពិនិត្យតាមដានវឌ្ឍនភាពនៃការអនុវត្តការងារ ស្របនឹងតួនាទីភារកិច្ចការទទួលខុសត្រូវ និងគម្រោងសកម្មភាពអនុវត្តបានដាក់ចេញនៅក្នុងផែនការប្រចាំឆ្នាំ ២០២៤ សម្រាប់ត្រីមាសទី១ របស់អគ្គលេខាធិការដ្ឋានអាជ្ញាធរទន្លេសាប ផ្តោតសំខាន់លើលទ្ធផលការងារ បញ្ហាប្រឈម និងគោលដៅអនុវត្តបន្ត និង (២) ពង្រឹងយន្តការការងារ ក្នុងក្របខ័ណ្ឌប្រសិទ្ធភាពការងារផ្ទៃក្នុង ឱ្យដើរទន្ទឹមនឹងបរិបទការងាររបស់សង្គម និងបរិការណ៍ឌីជីថល ។ ឯកឧត្តម ក៏បានលើកឡើងផងដែរ អំពីសារៈសំខាន់របស់ព័ត៌មាន-ទិន្នន័យ ដែលទទួលពីការសិក្សាស្រាវជ្រាវនៅតំបន់ជុំវិញទន្លេសាប និងតំបន់ពាក់ព័ន្ធរបស់អាជ្ញាធរទន្លេសាប ស្របពេលដែលក្រសួង ស្ថាប័នពាក់ព័ន្ធ និងអង្គការដៃគូអភិវឌ្ឍន៍នានា ត្រូវការជាចាំបាច់ ក្នុងការរៀបចំគោលនយោបាយ ផែនការយុទ្ធសាស្ត្រអភិវឌ្ឍន៍ គម្រោង/កម្មវិធី និងរួមគ្នាដោះស្រាយលើបញ្ហាប្រឈម ដែលបាន និងកំពុងតែកើតឡើងនៅក្នុងតំបន់បឹងទន្លេសាប ដូចជា វិស័យកសិកម្ម បរិស្ថាន ធនធានទឹក ជលផល សេដ្ឋកិច្ចសង្គម និងសុខភាពអនាម័យ ជាដើម ។
បន្ទាប់មកកិច្ចប្រជុំ បានធ្វើសេចក្តីរាយការណ៍ អំពីលទ្ធផលអនុវត្តការងារក្នុងរយៈពេល ៣ ខែកន្លងមក តាមរយៈសកម្មភាពអនុវត្តរបស់ឯកឧត្តមអគ្គលេខាធិការ ឯកឧត្តមអគ្គលេខាធិការរង លោកទីប្រឹក្សា និងនាយកដ្ឋានទាំង៤ ក្រោមឱវាទអគ្គលេខាធិការដ្ឋាន លើលទ្ធផលសម្រេចបាន បញ្ហាប្រឈម ទិសដៅបន្ត និងពិភាក្សារួចមក ។ ឯកឧត្តមប្រធានអង្គប្រជុំ បានវាយតម្លៃខ្ពស់ចំពោះការអនុវត្តនូវតួនាទីភារកិច្ច ការទទួលខុសត្រូវ និងផែនការសកម្មភាពប្រចាំឆ្នាំក្នុងត្រីមាសទី១ និងការអនុវត្តបទបញ្ជារបស់រាជរដ្ឋាភិបាល ក្នុងការកំណត់ដែនព្រៃលិចទឹក និងព្រៃលិចទឹកតំបន់១ តំបន់២ និងតំបន់៣ នៃខេត្តទាំង ៦ ជុំវិញបឹងទន្លេសាប ។
ជាមួយគ្នានោះដែរ ឯកឧត្តមប្រធានអង្គប្រជុំ ក៏បានផ្តល់ការណែនាំដល់ ឯកឧត្តមអគ្គលេខាធិការ ត្រូវសហការការងារជាមួយថ្នាក់ដឹកនាំ និងមន្ត្រីក្រោមឱវាទអគ្គលេខាធិការដ្ឋាន បន្តយកចិត្តទុកដាក់ពង្រឹងការងារបន្ថែម ពិនិត្យ ដោះស្រាយបញ្ហាប្រឈម ដែលបានលើកឡើង និងបានធ្វើឱ្យរាំងស្ទះការងារនៅក្នុងត្រីមាសទី ១ នេះ ដើម្បីកែលម្អការអនុវត្តនៅត្រីមាសទី ២ ឱ្យទទួលបានជោគជ័យ និងមានប្រសិទ្ធភាព និងទទួលបានឯកសាររបាយការណ៍បច្ចេកទេសសិក្សាស្រាវជ្រាវប្រកបដោយគុណវុឌ្ឍ ។
នៅចុងបញ្ចប់នៃកិច្ចប្រជុំ ឯកឧត្តមប្រធានអង្គប្រជុំ ក៏បានពាំនាំការផ្តាំផ្ញើដ៏ខ្ពង់ខ្ពស់ពី ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ជូនដល់ឯកឧត្តម លោក លោកស្រី បន្តយកចិត្តទុកដាក់ និងជម្រុញការអនុវត្តការងារឱ្យមានប្រសិទ្ធភាព រួមមាន ៖
១. ជម្រុញបង្កើតឱ្យមាន Tonle Sap E-library និងពង្រឹងប្រព័ន្ធផ្សព្វផ្សាយ (Media) របស់អាជ្ញាធរទន្លេសាប
២. ពង្រឹងប្រសិទ្ធភាពគ្រប់គ្រងទិន្នន័យ-ព័ត៌មាន (Sever ) ដោយមានការចូលរួមកាន់តែសកម្មក្នុងការបញ្ចូល-ចែករំលែកទិន្នន័យ-ព័ត៌មាន
៣. ពង្រឹងការសិក្សាស្រាវជ្រាវ និងផលិតរបាយការណ៍របកគំហើញការសិក្សាស្រាវជ្រាវ ដើម្បីជូនរាជរដ្ឋាភិបាល និងក្រសួងស្ថាប័នពាក់ព័ន្ធ ជ្រាបជារបាយការណ៍ និងប្រើប្រាស់ជាប្រយោជន៍ក្នុងការចូលរួមលើកកម្ពស់ប្រសិទ្ធភាពការអនុវត្តយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល
៤. បន្តការយកចិត្តទុកដាក់សម្របសម្រួល និងពង្រឹងកិច្ចសហការជាមួយក្រសួងស្ថាប័ន និងដៃគូរពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ក្នុងការចូលរួមអនុវត្តសកម្មភាពសិក្សាស្រាវជ្រាវនៅតំបន់បឹងទន្លេសាប និងតំបន់ពាក់ព័ន្ធ
៥. បន្តពង្រឹងអភិបាលកិច្ចការងារ កសាងសមត្ថភាពដល់មន្ត្រី និងលើកទឹកចិត្តមន្ត្រីសកម្ម ។
សូមបញ្ជាក់ថា ផែនការសកម្មភាពប្រចាំឆ្នាំ២០២៤ របស់អគ្គលេខាធិការដ្ឋាន អាជ្ញាធរទន្លេសាប សម្រាប់គាំទ្រផែនការយុទ្ធសាស្ត្រ អាជ្ញាធរទន្លេសាប ២០២៤-២០២៨ ត្រូវបានដាក់ឱ្យដំណើរអនុវត្តកាលពីថ្ងៃទី ២៥ ខែមករា ឆ្នាំ២០២៤ ដែលមានសកម្មភាពចំនួន ២៨ ហើយសកម្មភាពទាំងនោះបានបន្ស៊ីជាមួយនឹងសកម្មភាពយុទ្ធស្រាស្ត្រ ទិសដៅយុទ្ធសាស្ត្រ និងគោលដៅយុទ្ធសាស្ត្រ នៃផែនការយុទ្ធសាស្ត្រ អាជ្ញាធរទន្លេសាប (២០២៤-២០២៨)។
