នាថ្ងៃទី២៥ ខែវិច្ឆិកា ឆ្នាំ ២០១៦ នៅអគ្គលេខាធិការដ្ឋាន នៃអាជ្ញាធរទន្លេសាប មានរៀបចំវគ្គពង្រឹងការយល់ដឹងស្តីពី បទដ្ឋានគតិយុត្តក្របខណ្ឌ័ការគ្រប់គ្រងអាងទន្លេ ដល់ថ្នាក់ដឹកនាំ និងមន្ត្រីក្រោមឱវាទអគ្គលេខាធិការដ្ឋាន អាជ្ញាធរទន្លេសាប មានចំនួន៣០ នាក់ ក្រោមការដឹកនាំសម្របសម្រួលដោយ ឯកឧត្តម ហ៊ែល តូនី អគ្គលេខាធិការ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ក្រសួងធនធានទឹក និងឧតុនិយម និងជា ប្រធានអាជ្ញាធរទន្លេសាប ។
វគ្គបណ្តុះបណ្តាលនេះ គឺជាសកម្មភាពមួយក្នុងចំណោមសកម្មភាពផ្សេងទៀត ដែលមាននៅក្នុងផែនការសកម្មភាពប្រចាំឆ្នាំ ២០១៦ ស្ថិតក្រោមកម្មវិធីយុទ្ធសាស្ត្រកសាងសមត្ថភាពមន្ត្រីអាជ្ញាធរទន្លេសាប ក្នុងផែនការយុទ្ធសាស្ត្ររបស់អាជ្ញាធរទន្លេសាប ២០១៦-២០២០ ។ វគ្គពង្រឹងសមត្ថភាពនេះ មានគោលបំណង ៖
- ពង្រឹងការយល់ដឹងដល់មន្ត្រី អំពីបទដ្ឋានគតិយុត្តពាក់ព័ន្ធនឹងបញ្ហាគ្រប់គ្រងអាងទន្លេ និងធនធានទឹកទាំងកម្រឹតថ្នាក់ជាតិ ថ្នាក់តំបន់
- អោយយល់ពីកិច្ចការទូទៅអំពីការផ្សារភ្ជាប់រាល់បទដ្ឋានគតិយុត្តគ្រប់គ្រងអាងទន្លេ ជាមួយគោលនយោបាយរបស់ក្រសួង ក៏ដូចជារាជរដ្ឋាភិបាលកម្ពុជា
- បង្កើនការយល់ដឹងដោយផ្សារភ្ជាប់រាល់សកម្មភាពការងារសិក្សាស្រាវជ្រាវរបស់មន្ត្រីអាជ្ញាធរទន្លេសាប ជាមួយ នឹងបទដ្ឋានគតិយុត្ត និងគោលនយោបាយរាជរដ្ឋាភិបាល ។