ចាប់ពីថ្ងៃទី ០៤ ដល់ ០៧ ខែ តុលា ឆ្នាំ២០១៦លោក ស៊ិន វិសិទ្ធ ប្រធាននាយកដ្ឋានត្រួតពិនិត្យការធ្វើអាជីវកម្ម និងអភិរក្ស និងជាអនុប្រធានអនុវត្តគម្រោង បានដឹកនាំមន្ត្រីបច្ចេកទេសរបស់អគ្គលេខាធិការដ្ឋាន នៃអាជា្ញធរទន្លេសាបក្នុងគម្រោងគ្រប់គ្រងធនធានទឹកចម្រុះឆ្លងដែនមេគង្គរវាងទន្លេសាប (កម្ពុជា) និងអាងទន្លសុងក្លា (ថៃ) ចូលរួមវគ្គបណ្តុះបណ្តាលថ្នាក់តំបន់ ស្តីពី ជំនាញទំនាក់ទំនងព័ត៌មាននិងផ្សព្វផ្សាយ ដែលរៀបចំដោយ MRC នៅទីក្រុង វៀងច័ន្ទ ប្រទេសឡាវ។ វគ្គនេះមានការចូលរួមដោយបណ្តាប្រទេសក្នុងតំបន់ទន្លេមេគង្គទាំងអស់ដូចជា កម្ពុជា ឡាវ វៀតណាម និងថៃ សរុបចំនួន ៤០ នាក់ (សមាសភាពចូលរួមពីកម្ពុជាមានចំនួន ១០រូប ដែលជាមន្ត្រីតំណាងមកពីក្រសួងធនធានទឹក និងឧតុនិយម អាជ្ញាធរទន្លេសាប រដ្ឋបាលជលផល និងមន្ត្រីលេខាធិការដ្ឋានគណៈកម្មាធិការជាតិទន្លេមេគង្គកម្ពុជា)។
គោលបំណងនៃវគ្គបណ្តុះបណ្តាលនេះ គឺដើម្បីពង្រឹងការធ្វើទំនាក់ទំនងនៃគម្រោងឆ្លងដែនទាំងអស់ និងបង្កើនចំណេះដឹងដល់ការអនុវត្តគម្រោងទាំងអស់អោយចេះផ្សព្វផ្សាយនូវសមិទ្ធផល និងបញ្ហារបស់គម្រោងដូចជា អត្ថបទ ខ្លឹមសារ ទិសដៅ រូបភាព ចំណងជើងរបស់ដំណើរការអនុវត្តគម្រោង ។