នាថ្ងៃទី ១១ ខែ កក្កដា ឆ្នាំ២០១៦ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប និងជាសមាជិកក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ បានអញ្ជើញចូលរួមក្នុងកិច្ចប្រជុំបូកសរុបការងារប្រចាំ ឆមាសទី ១ ឆ្នាំ ២០១៦ ស្តីពី ការត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី ៣ របស់រាជរដ្ឋាភិបាលកម្ពុជា ក្រោមអធិបតីភាពឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ។ ឯកឧត្តម សួន បវរ អភិបាលនៃគណៈអភិបាលខេត្តបន្ទាយមានជ័យ បានធ្វើសេចក្តីរាយការណ៍អំពីលទ្ធផលការងារដែលក្រុមការងារថ្នាក់ជាតិបានចុះគ្រប់មូលដ្ឋានស្រុកទាំងអស់នៃខេត្តបន្ទាយមានជ័យនាពេលកន្លងមក ឯកឧត្តម បានបញ្ជាក់អំពីសំណូមពរ និងបញ្ហាប្រឈមផ្សេងៗដែលក្រុមការងារទទួលបានពីកម្មវិធីវេទិកាសាធារណៈនាពេលកន្លងមក និងបានចូលរួមដោះស្រាយយ៉ាងសកម្ម ជាពិសេសពីសំណាក់ឯកឧត្តម ឧបនាយករដ្ឋមន្ត្រី កែ គឹមយ៉ាន ដែលជាប្រធានក្រុមការងារ។ ឯកឧត្តម ឧបនាយករដ្ឋមន្ត្រី បានកោតសរសើរចំពោះលទ្ធផលនាពេលកន្លងមក និងបានដាក់ចេញនូវយុទ្ធសាស្ត្រថ្មីៗបន្ថែមទៀតជូនដល់ក្រុមការងារ យកទៅអនុវត្តបន្តក្នុងទិសដៅដើម្បីទទួលបាននូវប្រសិទ្ធិភាពការងារខ្ពស់។